SLOGAN - PORUKA NAD PORUKAMA

Kad sam bila mala, voljela sam da pišem tako-tako. Nazirao se tu neki talenat, ali ne toliko očigledan (kao što je bio slučaj ja pjevanjem, recimo). Prvo samosvješćivanje talenta pisanja desilo mi se na drugoj godini studija ekonomije kada mi je prof. Veso Vukotić dao knjigu o životu Starih Rimljana i tražio mi da napišem seminarski rad, a ja napisala neku lijepu priču, po meni ne baš mnogo ekonomski bitnu, :) ali baš lijepu. Starom vuku je to bilo dovoljno da prepozna kud bi mogao da zaplovi moj brod i navuče me na jednu novu vrstu pisanja, za koju je potrebno ući u tajne komunikacija.... Odškrinuvši mi dodatna vrata znanja, prof. Veso mi je dao knjigu na temu Odnosa s javnošću, koji su u to vrijeme bili apsolutna nepoznanica u našoj republici, a i u samoj SFRJ tek u začetku, uz zadatak da napišem novi seminarski rad. Ni poslije dvadeset godina nijesam zaboravila pažnju i podršku koju mi je pružio. Tako sam (potpomognuto susretanjem sa marketingom i divnim Miskom Jovovićem na trećoj godini) pronašla svoj budući poziv ali i upoznala svoj talenat za pisanje, što se izrodilo u pisanje u komunikacijama. Ne mislim ja da sam neka strašna spisateljica, ali da umijem s riječima-umijem. U okviru PR-a i marketinga, pronašla sam sebe i u pisanju slogana, naslova, tekstova, scenarija, govora... svega. Ali moram da priznam da su mi slogani i naslovi zaista bili prave poslastice. Možda i pamtite neke od njih: VRELA ZIMA U BRDIMA, JOŠ SMO NA VRIJEME, PROČITAJ ŽIVOT-PROŽIVI KNJIGU, STRUČNO JE KLJUČNO, PAMET U GLAVU-PLAN NA POPRAVNI, NA EX, PRAVAC POSLODAVAC, RECIKLAŽA NIJE GNJAVAŽA, NE OKREĆI GLAVU, IMA NEKA TRAJNA VEZA, NOVA IZ SNOVA, VEĆ U SRCU

Osmišljavanje slogana je proces. Podrazumijeva maksimalno upućivanje u problematiku/tematiku kako bi se ušlo u samu srž razumijevanja. Jer baš ta srž jeste budući slogan, ali još uvijek u svojoj sirovoj formi. Znate ono kad nas uče u školi kako pisati sastav, pa kažu da moramo imati uvod, razradu i zaključak. E, pa slogan vam dođe kao zaključak, odnosno njegova posljednja rečenica. Kruna cijele priče. Poruka nad porukama.
Kada pišemo slogane, najprije moramo znati za koju je namjenu. Kome je upućen. Što želimo da poručimo. Da li se radi o korporativnom sloganu koji treba da govori o kompaniji ili sloganu neke kampanje, koji govori o tom proizvodu/usluzi/aktivnosti... Ukoliko se radi o korporativnom sloganu, mora se uzeti u obzir misija i vizija kompanije, odnsno ono što je predviđeno u platformi brenda. Ukoliko se radi o sloganu kampanje onda analiziramo glavne poruke kampanje i izvlačimo slogan.

Ali, kako tu poruku nad porukama upakovati u slogan? Kako je napraviti prepoznatljivom i pamtljivom, te nametnuti je kao reprezenta brenda?
Možemo se voditi sljedećim principima:
- što kraći i jasniji to efektivniji (ipak, ako situacija to zahtijeva, bolje je da slogan ima i riječ više nego da je nejasan, ukoliko ostavlja prostora za nedoumicu, tamo gdje nedoumici nije mjesto)
-što lakše pamtljiv, to bolji: ukoliko iskoristimo neke lokalne fraze, termine, mudrosti, stihove, krilatice, prepoznatljive riječi koje upodobimo za našu stvar, to će slogan lakše zaživjeti i infiltrirati se u misli publike
-ukoliko se odlučite da koristite neke krilatice koje određene grupe mogu smatrati uvredljivim, dobro izvagajte i razmislite prije donošenja konačne odluke (recimo "čo'ek žena" je u starije vrijeme bio kompliment za crnogorsku ženu, a danas se može smatrati i uvredom, jer ukazuje na manju vrijednost žene i njenu maksimizaciju kroz izjednačavanje s muškarcem, jer se pod "čo'ek", ovdje često misli misli muškarac)
-neka budi direktne asocijacije na brend
-ako je dinamičan, ima ritam, rimu, to je bolji
-neka se jasno razlikuje ok konkurentskih, u poručivanju onoga što želite da istaknete, a što je (ako je moguće) drugačije od drugih
-neka bude istinit (svako potcjenjivanje publike/klijenata/korisnika na dug rok skupo se plaća. Valja biti iskren i isporučiti baš ono što najavljujemo, nikako manje od toga)

Završiću zaigrano. Razvijam lični brend LILAVILA i još uvijek nijesam došla do izrade slogana (mislim da će me baš ova promišljanja navesti da to čim prije i uradim) a neke prilike naletjeh na neki zabavni sajt www.sloganmaker.com koji iz rukava izbacuje slogane :) Ukucah Lila Vila i kliknuh na *Make a slogan* kad iskoči ovo.

Dobar zaključak za ovi priču, od mene vama. :)
Javljam vam kad sačinim slogan za Lila Vila brend.
Već mi se muva po mislima ;)


Tekst je objavljen na portalu bankar.me